Imaxes tomadas dende o renovado miradoiro de Santiorxo, en pleno Canón do Sil, serán algunhas das que ilustrarán o novo spot publicitario no que traballa Turgalicia para promocionar a comunidade galega no exterior. Así o adiantaba o alcalde de Sober, Luis Fernández Guitián, tras acompañar ao equipo audiovisual que se desprazaba o 6 de marzo ata esta zona da Ribeira Sacra lucense para iniciar a gravación. O rexedor agradécelle ao organismo público ter elixido emprazamentos da localidade para axudar na súa difusión a nivel mundial.
Ademais Fernández Guitián destaca “a importancia” de que o municipio vaia formar parte do anuncio e de todo o material promocional que elabore e distribúa Turgalicia, posto que, segundo remarca, “será o mellor altofalante de todo o que Sober e a Ribeira Sacra teñen para ensinarlle ao mundo enteiro”.
Foto: Cedida polo Concello de Sober
