Totalmente gratuíto e para toda clase de dispositivos electrónicos. O goberno municipal de Sober vén de instalar no centro da localidade un punto público de recarga que permite aos usuarios cargar a batería de teléfonos móbiles, tablets ou calquera outro dispositivo. Así o anunciaba o rexidor soberino, Luis Fernández Guitián. “O servizo”, explicaba, “está emprazado no xardín da praza do Concello”, onde “xa contamos dende fai tempo con Wifi gratuíto para todos os usuarios/as”. Tamén matizaba que este novo punto de alimentación conta con dous enchufes para todo tipo de aparatos de telefonía móbil e poderá utilizarse as 24 horas do día.
Deste xeito Sober convértese nun dos poucos concellos galegos en dispoñer deste tipo de servizo. O alcalde soberino salientou que “dende o Concello estamos sempre á vangarda e con esta nova incorporación queremos facilitar o uso das novas tecnoloxías a toda a veciñanza e tamén aos que nos visitan”.
