As rutas por adegas e covas, comendo e bebendo, están de moda e tamén en Sobrado (Trives) celebraban a súa no mediodía do 3 de agosto.
Despois da xornada inaugural da IX Festa Medieval con diferentes actividades (desfile de bandeiras e o traspaso de reinado; coroación e pregón da Raíña; representación do Foral; cea; teatro,…) chegaba o día grande, coa reunión de Damas e Cabaleiros na praza para dar comezo ao desfile polas adegas do pobo ao ritmo do grupo de gaitas Airiños de Caldelas, e o acompañamento da parella de xigantes recuperados hai uns anos.
A festa continuaba pola tarde coa música da charanga A Esmorga e xa pola noite coa temida e esperada Queima da Bruxa e a queimada, trala sentencia do Tribunal da Santa Inquisición que comezará en torno ás 23h.
Ao longo da fin de semana, a vila estivo engalanada lembrando o seu pasado medieval, con diferentes postos de artesanía e comida no mercado. Entre eles Artesanía Mendoia, con pirograbados en madeira “feitos con cariño en Galicia”.
Fotos: Carlos G. Hervella.
Máis información e fotos no seguinte enlace: https://osil.info/sobrado-trives-regresa-a-idade-media/
