SanidadeÚltima hora

SOS Sanidade Pública denunciará ante a Fiscalía o “desmantelamento” da Cirurxía Pediátrica no CHUO

A plataforma concentrouse hoxe diante das portas do CHUO para reclamar un servizo 24 horas. A protesta foi apoiada polos grupos da oposición do Parlamento de Gaicia
Concentración diante das portas do CHUO. // Foto: Carlos Asensio.

A plataforma “SOS Sanidade Pública” concentrouse hoxe, 28 de xuño, diante das portas do Complexo Hospitalario Universitario de Ourense (CHUO) para manifestar o seu malestar ante a falta dun servizo de Pediatría 24 horas. Así o manifestou o voceiro de devandita plataforma, Anxo Pérez Carballo. Dende esta plataforma aseguran que se está a facer un “desmantelamento progresivo deste servizo”. Esta iniciativa estivo apoiada polos grupos da oposición no Parlamento de Galicia, en concreto á concentración acudiron as deputadas Noela Blanco (PSdeG-PSOE); Eva Solla (En Marea) e Noa Presas (BNG).

Pérez Carballo animou a botar a vista atrás “cando hai sete ou oito anos había catro cirurxiáns pediátricos e o servizo de Cirurxía Pediátrica era o máis eficaz e efectivo e, incluso, o máis rendible de todos os servizos de Cirurxía de Galicia”. O voceiro apunta que a culpa deste deterioro é “da xestión do Partido Popular”. En 2012 a Cirurxía Pediátrica contou quedou con dous cirurxiáns “derivando a Vigo as intervencións urxentes e deixando aquí as programadas”, dixo. Pero, actualmente, o CHUO só conta cun cirurxián para este servizo de Pediatría “que, ademais, pouco lle queda para se xubilar”, asegurou Anxo Pérez, “polo que tampouco pode facer as intervencións programadas”. É dicir, todos os nenos están a ser derivados a Vigo e “os procesos tardan máis de seis meses en ser atendidos”.

Anxo Pérez Carballo. // Foto: Carlos Asensio.

Neste senso, Pérez Carballo asegurou que en Vigo “non van ser operados” senón que van comezar de novo con toda a rolda diagnóstica e probas. Dende a plataforma, en palabras do seu voceiro pensan o seguinte: “están conseguindo que unha vez que non queden cirurxiáns na nosa provincia e así non haberá problemas”. Pero este, segundo SOS Sanidade Pública, non é o único problema, xa que aseguran que dende a Xunta “non están a facer atraente este destino aos profesionais, xa que desmantelaron todo o servizo de Pediatría e, aínda que haxa unha oferta pública de emprego, non se cobren as prazas”. Tendo en conta todo isto, a plataforma denunciará ante a Fiscalía e acudirán ante o Valedor do Pobo.

Noa Presas. // Foto: Carlos Asensio.

As tres deputadas presentes neste acto subscribíronse ás palabras do voceiro de SOS Sanidade Pública. Noa Presas, deputada polo BNG para a provincia de Ourense no Parlamento de Galicia, asegurou que “esta é unha peza máis que se suma a outras cuestións que tanto o BNG coma outras forzas políticas denunciamos”. Pola súa banda, Noela Blanco, do deputada do PSdeG-PSOE no Hórreo, lembrou que o seu grupo parlamentario “apostou pola volta deste servizo á nosa provincia”. Blanco reiterou que “non estamos a pedir un luxo asiático” e asegurou que o que o Feijóo quere é “converter este hospital nun hospital de campaña, de segunda”. E animou a pensar “na provincia que é máis ca capital”.

Noela Blanco. // Foto: Carlos Asensio.

Finalmente, a voceira de En Marea, Eva Solla, avalou as palabras das súas compañeiras parlamentarias e asegurou que “seguiremos apoiando para que se restaure este servizo”. Reiterou que dende o seu grupo non entenden “por que os ourensáns e as ourensás non teñen dereito a unha sanidade pública de calidade”.

Eva Solla. // Foto: Carlos Asensio.

Texto: Carlos Asensio.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close