Talleres de educación Montessori, o 20 de outubro no Barco

Están organizados polo grupo de apoio á lactancia e crianza con apego “De Nai a Nai” e serán impartidos pola pedagoga e guía Montessori Mercedes Urbiola

 

Imaxe dun taller impartido anteriormente por De Nai a Nai sobre a metodoloxía Montessori no Barco./ Foto: A.R.

 

Aprender a aplicar na casa a filosofía Montessori. É o obxectivo dos talleres formativos que organizará o vindeiro 20 de outubro o grupo de apoio á lactancia e crianza con apego “De Nai a Nai” no Barco. “Neste taller descubriremos a etapa de desenvolvemento dos nenos/as de 0 a 3 anos, cales son as súas características, as súas necesidades e conforme a iso aprenderemos ferramentas prácticas para facer un ambiente preparado que desenvolva todo o seu potencial”, adianta Mercedes Urbiola, pedagoga e guía Montessori, que impartirá esta formación.

Esta actividade desenvolverase no local social de De Nai a Nai (4º andar do edificio da Biblioteca do Barco). O programa comezará co taller de 0-3 anos “Montessori na casa I” e continuará co taller de +3 anos “Educación cósmica” ás 15h. “Cada un deles é de 4 horas de duración e quedan moi poucas prazas libres. Para anotarse as persoas interesadas poden chamar ao 629 47 18 30”, sinala a presidenta de De Nai a Nai, Lorena Prada.

Este taller está dirixido a pais, nais, educadores ou a calquera persoa interesada en descubrir outra forma de educar. “Para crear un ambiente Montessori é necesario aplicar os principios fundamentais: orde, estética, interese e obxectivo. É recomendable que os pais preparen o ambiente, tendo en conta as verdadeiras necesidades do neno e permitíndolle ser autónomo, participar na cociña, limpeza, responsabilizarse das súas propias cousas, realizar as actividades ao seu propio ritmo”, explican dende De Nai a Nai.

Tamén se destaca que a “educación cósmica” é a base sobre a que se constrúe “a aprendizaxe nun ambiente Montessori de primaria. O neno ten o interese e a capacidade de ampliar o seu campo de coñecemento moito máis alá do que lle rodea, daquelo que pode ver e tocar. A súa mente é capaz de comprender conceptos abstractos e non hai límites para o que a súa imaxinación poida alcanzar”.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies