Na mañá do 6 de marzo, o IES Carlos Casares de Viana do Bolo, acollía unha nova actividade encadrada dentro de “O mundo que queremos”, un proxecto de educación para o desenvolvemento que forma parte da plataforma de innovación educativa Plan Proxecta. Trátase dunha iniciativa que pretende promover a reflexión do alumnado sobre a conexión existente entre as dinámicas locais e as desigualdades globais, neste caso a través da comunicación (podcast, imaxes e teatro) como medio para sensibilizar e transformar.
Nesta ocasión sería a través dun obradoiro de teatro do oprimido/a, unha metodoloxía e unha práctica teatral que pretende transformar as realidades opresivas a través de medios estéticos e o diálogo entre os e as oprimidas, intentando espertar conciencias ás inxustizas para denuncialas e loitar contra elas.
O obradoiro foi impartido polo grupo de Teatro dxs oprimidxs “100tolas”. e ao igual que nos anteriores que formaron parte do programa, o obxectivo foi favorecer a participación e protagonismo do alumnado na peza teatral como parte esencial da aposta metodolóxica desta iniciativa.