Cos días grandes do Nadal á volta da esquina, os centros escolares collían hoxe, venres 21 de decembro, as vacacións. Pero antes, un a un, os colexios ían tendo os seus particulares festivais nos que non faltaron nin a música, nin o teatro nin tampouco os agasallos.
Tal era o caso do CEIP Xosé Manuel Folla Respino de Vilamartín de Valdeorras que nesta mañá festexaban o Nadal por todo o alto. Entre as actividades programadas estaba unha obra de teatro interpretada por alumnos de 5º e 6º. Mentres se preparaban para facer os deberes, sete estudantes expoñían súa propia visión do Nadal, explicando porque “lles gustaba” ou porque “a odiaban”. E entre medias, tamén houbo espazo para a música, interpretando en directo temas como What a wonderful world diante dun entregado público.
E despois das representacións, subíanse aso escenario os Reis Magos para entregar agasallos a todos os cativos, por xentileza da ANPA.
A Asociación de Nais e Pais é tamén a encargada de organizar un Belén Vivinte na praza de Vilamartín, no marco da feira que se celebrará o luns 24 de decembro pola mañá.
Fotos: Carlos G. Hervella, excepto as catro últimas da galería que son cedidas.
