Crear un espazo de interacción e sociabilidade entre as persoas da Veiga que redunde no fomento do asociacionismo e a participación das mulleres. Este é o obxectivo do proxecto “Tecendo rúas… Tecendo soños”, ideado polos Servizos Sociais comunitarios deste municipio e en cuxa organización participa o Centro de Animación Rural de Mulleres da Veiga.
As mulleres de diferentes núcleos do concello teceron durante tardes enteiras, facéndose compañía, e dando pé á elaboración de obxectos e pezas que integran a exposición que se inauguraba no mediodía do 11 de agosto coa presenza da secretaria xeral de Igualdade, Susana López Abella, do alcalde da Veiga, Juan Anta, e da presidenta da Asociación de Mulleres Rurais da Veiga, Julita Rodríguez Barrio. O acto contou coa actuación das cantareiras da Banda Real da Deputación de Ourense e coa entrega de medallas ás mulleres que colaboraron na recuperación das cantigas tradicionais.
Durante a inauguración López Abella destacaba a importancia deste proxecto, no que a Secretaría Xeral de Igualdade colaborou economicamente, e animaba aos seus impulsores a seguir nesa liña, promovendo iniciativas que sexan útiles ás mulleres da Veiga.