A feira ourensá Termatalia 2016 vén de promocionarse na feira ExpoSpa celebrada no World Trade Center (WTC) de Ciudad de México, un dos foros máis amplos para este sector en América Latina e que está organizada pola Asociación Latinoamericana de Spa. As actuacións de Termatalia arrincaron coa inauguración do Congreso Lationamericano de Spa, na que tomou parte o director xerente de Expourense, Alejandro Rubín.
No evento, seguido por máis de 800 profesionais, levouse a cabo un panel no que Termatalia foi analizada como ferramenta para o posicionamento global de destinos de turismo de saúde e benestar. Contou coa presenza de representantes galegos como a exsecretaria de Turismo da Xunta e exdeputada do Parlamento de Galicia, Carmen Pardo.
O director de Termatalia, Alejandro Rubín, durante a súa viaxe a México intensificou a rede de contactos de cara a próxima celebración de Termatalia neste país, co obxectivo de que tanto profesionais como empresas do sector de turismo de saúde e benestar, como turismo en xeral poidan xerar novas oportunidades de negocio.
