Os comercios barquenses xa están preparados para “Entretendas”, xa que comeza ás 18:30 horas e rematará ás 20:30 horas deste venres, 7 de agosto. Será na rúa Conde de Fenosa (entre a rúa Castelao e a avenida da Estación), que pasará a ser de dirección única durante a actividade co fin de ampliar o espazo peonil e garantir a distancia de seguridade entre os cidadáns. A actividade estará amenizada polo Grupo Troula coa actuación de zancudos “Benito e Rufina”, con dous pases a partir das 18:00h.
Segundo o concelleiro de Comercio e Turismo, Eladio Santos, con esta iniciativa búscase “animar ao comercio do Barco e aos consumidores para que siga con forza este sector comercial que para nós é moi importante”. Sobre os espectáculos na rúa, o concelleiro quixo destacar que están pensados para “un público infantil e familiar” e que ademais “son itinerantes”, polo que non haberá concentracións de persoas.
Fotos: Carlos G. Hervella
