Centos de traballadores do CHUO (Complexo Hospitalario Universitario de Ourense) concentráronse na mañá de hoxe, 12 de xaneiro, na antiga entrada ao Hospital para protestar contra “a redución de 41 a 36 camas das novas unidades de Hospitalización”. Segundo explicou Asunción Maus, Presidenta da Xunta de Persoal da EOXI de Ourense, Verín e O Barco de Valdeorras, “de momento as camas van seguir funcionando porque o hospital está nunha situación de saturación total”. A voceira explicou que “as camas van estar pechadas para a atención ordinaria e só se van abrir en caso de que sexa necesario”, unha medida que cualificou de “inxusta”.
En canto a estas afirmacións, dende o CHUO aseguran que si que hai un incremento de ingresos que se veñen rexistrando dende finais de ano. Neste senso din que “ademais do aumento de camas, que supuxo a apertura do novo edificio de Hospitalización”, din, o Complexo hospitalario “mantén abertas as tres plantas do Materno Infantil”, que quedaron desocupadas co traslado, o que supón 123 camas e 105 profesionais contratados máis para atender á ocupación actual que rolda o 115%, cifran dende o CHUO.
Pero a presidenta da Xunta de Persoal da EOXI asegura que hai un peche de camas e, o que vai provocar é “unha mingua nos postos de traballo nos servizos de atención aos pacientes porque vamos estar de xeito continuado nas unidades de Hospitalización a expensas de que se contrate persoal de reforzo para que atendan a esas camas que se van pechar”, dixo. Asemade, argumentou que se está pondo en xogo a “confortabilidade e a dignidade dos pacientes”.
Neste punto, a Xerencia do CHUO reiterou que “non existe previsión algunha de pechar camas nin reducir persoal”. Nesta liña, dixeron que continuarán “ampliando os recursos para que todo o que precise ingresar o faga nas mellores condicións, atendido polo persoal que sexa necesario”. E reiteran que estase a confundir un trámite administrativo “como a convocatoria de acoplamentos internos ou traslado de persoal dentro do propio hospital, cunha suposta redución de camas ou profesionais” e que, dende a apertura do novo edificio de Hospitalización, “o número de persoal e contratacións aumentaron case un 6%”.
Pero para os que hoxe se concentraban ás portas do Complexo ourensán estas afirmacións non son verídicas xa que, como reza o manifesto que leron ao final da concentración, a Xunta de Galicia fai “un desprezo absoluto” cara á provincia de Ourense en materia sanitaria, e apoiaron as súas verbas asegurando que “seguimos sen hemodinámica 24 horas; non temos máis ca unha terceira parte do servizo de cirurxía pediátrica -algo que xa reclamaran as deputadas Noela Blanco (PSdeG-PSOE), Noa Presas (BNG) e Eva Solla (En Marea) o pasado verán e a plataforma SOS Sanidade Pública- ; temos a poboación máis avellentada de España e non temos Atención Xeriátrica; lista de espera en Atención Primaria dunha semana e as Urxencias saturadas; falta de Atención Especializada nos Hospitais Comarcais e privatización de servizos”.
Por todo isto, anunciaron que o vindeiro luns, 15 de xaneiro, convocarán unha asemblea de traballadores no primeiro andar do Edificio Cirúrxico ás 14:00 horas. Tamén van solicitar unha xuntanza “de carácter urxente”, dixo Asunción Maus, co Conselleiro de Sanidade e coa Xerencia da EOXI de Ourense, Verín e O Barco de Valdeorras.
Texto: Carlos Asensio.
