Tres probas nunha. O I Trail e Andaina Trevinca-A Veiga, no que se disputará o II Campionato de Galicia de Trail, inclúe tres modalidades deportivas distintas. Ademais dunha andaina, incluirá “dous tipos de trail: un trail longo que é o campionato galego para xente máis experimentada de 21 quilómetros e un trail curto para persoas que non teñen esa experiencia para complementar que non é o campionato galego, sería o trail da Veiga de 15 quilómetros e, a andaina cunha distancia de 13 quilómetros”, tal e como explicaba, director técnico da Delegación da Federación Galega de Atletiso en Valdeorras, Agustín González, no acto de presentación que tiña lugar na mañá do 8 de marzo na Deputación de Ourense.
Esta proba celebrarase o vindeiro 3 de abril na Veiga e forma parte do circuíto “Comparte Valdeorras”. Os interesados en participar teñen de prazo para inscribirse ata o 31 de marzo e poderán facelo a través da páxina web www.carreirasgalegas.com. O prezo da inscrición é de 10 euros no caso de realizarse antes do 28 de marzo, e despois desta data o prezo da inscrición será de 15 euros.
Ademais de Agustín González, no acto de presentación deste evento participaban a deputada provincial de Turismo, Ana Villarino, o asesor de Deportes da Deputación, Bernardino González; o alcalde do concello da Veiga, Juan Anta; e o delegado da Delegación valdeorresa de Atletismo, Manuel Rodríguez Teijeiro.
Máis información na edición en papel do Periódico O Sil
