Rozando as sete desta tarde un menor sufría un atropelo no lugar de Outeiro, na localidade ourensá de Vilar de Santos. Ante o suceso mobilizábase o helicóptero medicalizado con base en Ourense, tal e como informa o 112 Galicia.
Ademais, inmediatamente, os operadores do Centro Integrado de Atención ás Emerxencias de Galicia alertaron aos axentes da Garda Civil de Tráfico e aos Bombeiros de Xinzo.
Pouco despois, os servizos sanitarios confirmáronlle ao 112 que o rapaz ía ser trasladado no helicóptero cara o Complexo Hospitalario Universitario de Ourense.
Saída de vía con feridos en Baños de Molgas
Unha hora antes do sucedido en Vilar de Santos, o 112 Galicia tamén era avisado dunha saída de vía con dúas persoas feridas, no concello de Baños de Molgas.
Novamente, foron os servizos sanitarios de urxencia os que indicaron que o accidente tiña lugar na estrada de Maceda cara o Santuario dos Milagres, segundo o 112 Galicia. Nese momento, dende o CIAE-112 informouse aos axentes da Garda Civil de Tráfico, aos Bombeiros de San Cibrao, ao GES de Pereiro de Aguiar e aos membros de Protección Civil da localidade.
As dúas persoas feridas foron trasladadas para recibir atención sanitaria.