Publicidade
CulturaCulturaGalerías de fotosÚltima hora

Travesía polos mares do mundo cos contos e cantos de Xurxo Souto, no Barco

Este músico e narrador oral presentaba o seu espectáculo "Oceáno para terrícolas" no oitavo ciclo "De Perto"

 

Dende o Xardín da Casa Grande de Viloira (O Barco), Xurxo Souto chamaba ao mar na tarde do 3 de xullo co seu espectáculo “Océano para terrícolas”. E facíao acompañado polo público do ciclo “De Perto” ao berro de “Medre o mar, medre!!!”.

E o prodixio obrábase. O mar, ou mellor dito, os mares de diferentes partes do planeta confluían neste recuncho valdeorrés a través dos cantos e das historias de mariñeiros galegos en Irlanda relacionadas con botas de viño, co contrabando ou co segredo mellor gardado dun barco: o do pementón co que aliñaba os seus guisos o cociñeiro.

A travesía continuaba polo océano Índico, onde está a illa Agalega, “lembranza da senda portuguesa”, con contos que demostraban que “nas cousas do mar o galego é a lingua máis cosmopolita”; ou polo Canal de Panamá, entre outros lugares.

Pero nesas historias non só había mariñeiros, tamén mulleres relacionadas co mar. A partir deses relatos, Souto aí abría o universo sonoro do cancioneiro interpretado polas mulleres cuxos oficios están relacionados co mar: dende mariscadoras a redeiras. A elas adícalles o seu último libro: “A gran travesía de Chiruca Macallás”.

“Todos estamos no mar”, insistía Xurxo Souto, desvelando os vínculos entre os do interior e os da costa, con exemplos como o da casa máis bonita de Froxán (Folgoso do Courel),  que era a do Calexón, dun mariñeiro en Terranova que enchía todo o corredor de enormes follas de bacallau. Por iso, “non somos periferia de nada, somos o centro do mar”.

Fotos: Ángeles Rodríguez.

 

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close