O alumnado de 50 centros educativos de toda Galicia participará durante dous cursos académicos no proxecto Digicraft, que ten como obxectivo a mellora das competencias dixitais dos máis novos, entre eles o do CEIP Plurilingüe Condesa de Fenosa do Barco e o do CEIP Xosé Manuel Folla Respino de Vilamartín e o do CEIP Plurilingüe Virxe do Camiño de Rubiá.
Na presentación, cos docentes e directores dos colexios participantes nesta iniciativa desenvolvida en colaboración coa Fundación Vodafone España, a conselleira de Educación salientou que Galicia é unha das poucas comunidades autónomas que está facendo unha aposta “serie e global” polo uso “seguro e crítico” da tecnoloxía nas aulas desde a etapa de infantil, e sempre “coidando incorporar contido humanístico á revolución tecnolóxica que vivimos”. Nesta liña enmárcase o proxecto Digicraft no teu cole xa que -en palabras da conselleira- “fai unha aproximación diferente que trata de achegar os estudantes ao mundo dixital converténdoos en creadores, non como consumidores”.
O proxecto Digicraft no teu cole ten como obxectivo potenciar o desenvolvemento da competencia dixital na infancia e na xuventude, a través dun programa de formación e reforzo das habilidades dixitais e das competencias asociadas do que se beneficiarán máis de 3.800 nenos de entre 6 e 12 anos. Ao seu abeiro, tal como explican dende Educación, traballaranse nas cinco áreas competenciais que definen a competencia dixital, en concreto a información e alfabetización informacional, a comunicación e colaboración, a creación de contidos dixitais, a seguridade e a resolución de problemas. Dentro delas abordaranse asuntos como a procura e filtrado de datos, a participación cidadá en liña, a xestión da identidade dixital, os dereitos de autor e licenzas, a programación, a protección de datos persoais e a privacidade ou a identificación de necesidades e respostas tecnolóxicas, entre outros aspectos.
En cada curso académico trabállanse dous itinerarios de 14 horas de duración (un total de 1 h/semana durante 28 semanas lectivas), compostos por unha serie de actividades que van aumentando gradualmente en nivel de dificultade. “As actividades combinan o mundo dixital e a tecnoloxía co xogo, o aprender facendo e o desenvolvemento de habilidades motoras”, din dende a Consellería.
Cada actividade conta cunha guía didáctica na que se explica que competencias (dixitais e xerais) se traballan, os obxectivos que se queren lograr, o material necesario e os pasos para seguir para realizala. Dado que traballa parte das competencias definidas no currículo de primaria, Digicraft no teu cole pódese impartir tanto en horario lectivo como fóra del.
Uns 100 docentes dos 50 centros seleccionados recibirán formación específica para impartir o programa nas aulas. Ademais, dotarase os colexios de 600 tabletas e 100 kits tecnolóxicos instant dixital skills. Estes kits contan con placas de programación básica axeitadas para nenos, materiais para visualizar elementos en realidade aumentada de forma sinxela e manexable; pirámides holográficas que permiten a visualización de hologramas e algúns outros materiais tales como barallas de cartas e taboleiros. Así mesmo facilitaráselles aos centros acceso aos materiais descargables para o desenvolvemento das actividades recollidas no programa.
