Son percorridos de dificultade baixa, pensados para todos os públicos e que pretenden amosar a riqueza e fermosura da montaña trivesa e da súa paisaxe. O vindeiro 17 de xullo o Concello da Pobra de Trives dará comezo ás rutas de sendeirismo familiar, unha das propostas do seu variado programa de actividades de verán.
“O roteiro do mércores 17 de xullo levaranos ata Os Sequeiros, en pleno contacto coa natureza, mergullándonos na maxia dos seus bosques e desfrutando da paisaxe do Val do Navea (“Primeira paisaxe protexida de Galicia”)”, adiantan dende o Concello. O punto de encontro dos participantes será a praza do Concello ás nove da mañá, “cada un no seu vehículo, sairá cara o pobo de Pena Folenche e desde alí comezará o sendeiro ás 9:20 h.”, concretan dende a organización. O traxecto será duns 3 km.
Os participantes nesta ruta poderán coñecer “cal era a función dun sequeiro e de volta ao pobo da Pena Folenche subiremos ata o mirador desde onde podemos ver as montañas que nos rodean”, din dende o Concello. As persoas interesadas en participar poderán inscribirse na Oficina de Turismo ata o día andes do roteiro. É de balde.
