Entre os concellos que contarán cun stand propio no XIX Salón Internacional do Turismo Gastronómico, Xantar, que se celebrará en Ourense estará o da Pobra de Trives. Acudirá á mostra, que terá lugar do 31 de xaneiro ao 4 de febreiro, cun stand maior que o de anteriores edicións para “promocionar a bica e o resto de produtos turísticos do municipio, tales como viño e embutidos, nunha das mellores plataformas que existen agora mesmo en Galicia”.
O Concello trivés, co apoio dos produtores de bica, viño e embutido; considera “especialmente importante a participación en foros deste tipo, xa que a gastronomía é a segunda motivación dos turistas para visitar Galicia, polo que apostamos por esta cita para promocionar a nosa oferta enogastronómica e tamén turística”.
Tamén se incide en que se buscará “dar a coñecer A Pobra de Trives do maior e mellor xeito posible. As dúas adegas do noso Concello terán os seus viños no Túnel do Viño, onde poderán ser catados durante toda a duración da feira polos visitantes á mesma”.
Ademáis o sábado 3 de febreiro será o día adicado ao Concello da Pobra de Trives é ás 13:30h terá lugar unha degustación dos nosos produtos no stand (bica, embutidos, viños). “Animámosvos a que veñades a visitar o noso stand e coñecer un pouco máis da enogastronomía e turismo da Pobra de Trives, e coñecer onde xantar e durmir, que actividades se poden facer ou que visitar neste Concello”, indican dende a administración local.
