CulturaCulturaGalerías de fotosÚltima hora

Trives únese á celebración do Día da Restauración da Memoria Lingüística

No mediodía do 27 de outubro tiña lugar no cemiterio municipal un acto con diversas intervencións, música, lecturas de poesía e a descuberta dunha placa

“Como un xeito de amosarlle a gratitude a cantos fixeron posible que Galicia siga a ter cultura e lingua de seu, transmitíndonos un legado cultural que nós lle debemos transmitir a outras xeracións que nos sucedan” celebraba o Concello de Trives o Día da Restauración da Memoria Lingüística. E facíao cun acto que se desenvolvía no mediodía do 27 de outubro no cemiterio municipal coa presenza de numerosas persoas.

A celebración comezaba cun preámbulo musical da man da Banda de Gaitas trivesa Os Trintas. A continuación tomaban a palabra Xosé González e Carme Pérez Vaquero, da Asociación de Funcionarios para a Normalización Lingüística; Xosé Luis Cid, ex decano da Facultade de Pedagoxía e organizador das xornadas dedicadas a Manuel Acuña. A Real Academia Galega tamén quixo estar presente no acto e facíao a través do seu académico Xosé Luis Franco Grande. O acto pechábase cunha serie de lecturas e discursos e coa intervención do alcalde da Pobra de Trives, Domingo Diéguez.

Tampouco faltou un bloque de recitado de varios poemas leídos e interpretados por veciños e veciñas, no que se fixo unha pequena homenaxe ao escritor trivés Manuel Acuña, coa lectura dos seus versos. Deseguido actuaba o Orfeón Trivés, interpretando “Meu amor é mariñeiro”.

Finalmente descubríase na entrada do cemiterio trives unha placa adicada á “memoria de todos e todas os que aquí xacen, porque grazas a eles e elas Galicia segue a ter cultura e lingua de seu” mentres a Banda de Gaitas interpretaba o himno galego. Ademais os veciños puideron asinar a acta de vontades e mesmo recoller a súa propia acta persoal asinada por Domingo Diéguez e Xosé Luis Franco Grande.

“Adherímonos así á celebración deste día, que xa se vén conmemorando dende hai anos por estas datas, co gallo de manter viva a nosa cultura e recordándovos que o galego tamén debe estar presente nos nosos cemiterios. Mirando as estatísticas sorprende ver que actualmente só unha de cada mil lápidas está escrita no idioma da persoa que alí repousa e tan só un 2 por cento das esquelas se publican en galego. Ademais é un acto moi significativo, xa que como galegofalantes que somos moitos de nós debemos axudar a que a lingua galega abranga todos os eidos da existencia dos galegos e galegas acompañándonos ata na hora do noso pasamento”, indican dende o Concello de Trives.

Fotos: Concello da Pobra de Trives.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close