A concelleira de Cultura do Concello de Ourense, Ana Garrido, vén de presentar o espectáculo teatral “O corazón de Auria”, unha actividade baseada no pasado literario da cidade, coma o libro de Eduardo Blanco Amor “La Catedral y el niño” que se levará a cabo con motivo da celebración do Día do Libro, do 23 ao 25 de abril.
Mañá xoves día 23 ás 20h, o venres 24 ás 19h. e o sábado 25 ás 12h. e 20h. poñerase en escena esta representación que terá como punto de partida a escalinata da fachada principal da Catedral (praza de San Martiño), para continuar facendo o percorrido arredor da propia Catedral pola praza do Trigo seguindo por praza dos Suaves, encarando a rúa Juan de Austria ata a Porta norte, para dende alí volver á fachada principal.
“O corazón de Auria” concibe á Catedral coma o corazón de Ourense, centro dos seus sentimentos e tamén coma un libro no que contén a historia da cidade, por iso o templo será o protagonista deste espectáculo inédito que foi creado para a ocasión e que pretende “poñer en valor o patrimonio da cidade ao mesmo tempo que celebramos o Día Internacional do Libro” en palabras da concelleira de Cultura.
Os personaxes da historia, escrita polo dramaturgo Fernando Pedrido, e dirixida polo ourensán Tito Asorey, son Perfeuto, un guía novato estudoso da historia e influenciado polo racionalismo; Manoel, un intuitivo músico; e Eliana, unha invidente. A través dun conflito entre o material e o espiritual, os tres guiarán ao público pola historia e polos distintos escenarios.
Fotos: Carlos G. Hervella.