A Xunta de Galicia vén de recoñecer a excelencia de 21 titulados da Formación Profesional cos premios extraordinarios de grao superior, co obxectivo de “poñer en valor o traballo do alumnado que cursa estas ensinanzas con resultados excelentes”. De feito, para optar a estes premios os estudantes debían contar cunha cualificación final do ciclo formativo igual ou superior a 8,5 puntos, entre outros requerimentos.
E entre eses titulados están dous ourensáns: Javier Rodríguez Tato do IES Lauro Olmo do Barco de Valdeorras, estudante da familia profesional Administración e Xestión; e Marta Blanco Álvarez do IES 12 de Octubre (Imaxe Persoal).
A dotación orzamentaria para estes premios é de 19.550€ que se distribuirán entre as persoas premiadas na mesma contía, non podendo exceder dos 850€ por premio. Ademais da correspondente dotación económica, a obtención destes premios dálle dereito ao alumnado a concorrer, logo de inscrición, ao correspondente premio nacional de formación profesional de grao superior.
