Arredor das dúas e media da tarde deste venres 21 de maio un home que realizaba traballos de roza na zona das piscinas de Sobradelo (Carballeda de Valdeorras) caía á beira do río Sil, tal e como informa o 112 Galicia, que era alertado do suceso por unha chamada.
Os xestores do 112, de inmediato puxeron os feitos en coñecemento do Servizo de Urxencias Sanitarias de Galicia-061, do Grupo de Emerxencias Supramunicipal (GES) Valdeorras, da Garda Civil e dos bombeiros.
“En comunicación novamente co alertante, comunica que a persoa está fóra do río pero nun lugar de difícil acceso para a entrada da ambulancia. Finalmente, aínda que os bombeiros se desprazaron ata o lugar, descartouse a súa intervención, posto que a persoa puido ser evacuada e trasladada en ambulancia polos profesionais sanitarios” ata o Hospital Público de Valdeorras, segundo o 112 Galicia.
