Esta mañá tiña lugar o acto de entrega dos premios da XXIV Cata dos Queixos e da XX Cata dos Meles de Galicia, un certame no que resultaba distinguido un mel trivés. No acto participaba o conselleiro do Medio Rural, José González, que estivo acompañado polo director da Axencia Galega da Calidade Alimentaria, José Luis Cabarcos.
O titular de Medio Rural poñía aos produtos distinguidos como exemplo de que Galicia é etiqueta Calidade, en alusión á nova campaña da Xunta para divulgar o bo facer da xente do mar e do agro que se deu a coñecer onte mesmo, tamén no marco da I Mostra de Calidade Alimentaria que se clausurará esta tarde no Pazo de Quián, no concello coruñés de Boqueixón.
Na súa intervención, o titular de Medio Rural sinalou que “o mel é o acompañante perfecto do queixo, dous alimentos tan senlleiros como saborosos, que merecen un recoñecemento polo traballo realizado a prol da diferenciación, da singularidade e da calidade”. Ademais felicitaba aos gañadores (entre os que estaba o mel de castiñeiro de Labrega Mel de Trives, que recibía o bronce categoría de monofloral) “polo seu saber facer e pola súa profesionalidade” e agradecíalles o seu labor de dinamización no rural.
As Catas dos Queixos e dos Meles 2021 están organizadas pola Xunta en colaboración cos diferentes consellos reguladores da indicación xeográfica protexida Mel de Galicia e das catro denominacións queixeiras de Tetilla, Arzúa-Ulloa, San Simón da Costa e Cebreiro. Nesta edición do certame se presentaron 51 mostras de 30 queixerías e outros 43 rexistros de 25 industrias de mel galego.
Come atlántico
A I Mostra de Calidade Alimentaria clausurarase esta tarde co evento Come atlántico, que dará comezo ás 16,30 h. Así, a esa hora terá lugar unha conferencia sobre as fortalezas da Dieta Atlántica, a súa adaptabilidade ás diferentes necesidades nutritivas e o seu futuro dentro da promoción dos produtos de calidade alimentaria de Galicia.
Posteriormente, ás 17,30 horas, está prevista unha degustación de produtos con acompañamento musical para os asistentes.