Da man da Asociación Veciñal San Breixo, Seixalbo (Ourense) recibe un ano máis, e xa van 31, ao outono cunha apretada axenda de actividades que malia nacer como Semana Cultural aumentou a un mes e desenvólvese dende hoxe ata o 7 de outubro.
O pistoletazo de saída será esta tarde (20:15h.) coa presentación pública da programación no local da Asociación. Un acto que incluirá un recital poético a cargo da poeta ourensá Rochi Nóvoa, acompañada musicalmente de Puntxa e Dani Soldevilla, e do poeta local Manuel Herminio Iglesias co fondo musical de Daniel I. Losada.
Entre os pratos fortes da programación, atópase a clásica viaxe cultural, nesta ocasión con visitas guiadas á Illa de San Simón e á Vila Romana de Toralla. Ademais haberá xornadas de convivencia intercultural en colaboración co colectivo migrante do Programa Teranga da Fundación Juan Soñador, e de convivencia veciñal, cun obradoiro infantil de repostería e unha cata-exposición de repostería tradicional elaboradas polas familias de Seixalbo.
Tamén destaca un ano máis á representación teatral dunha obra adaptada e interpretada por actores locais, cunha coreografía de bailarinas tamén da localidade. Neste caso, trátase dunha recreación do Mundo de Oz, no Auditorio de Penouzos.
A clausura do Seixalbo Cultural 2018 será xa en outubro cun concerto do grupo local Cantigas de Seixo na Igrexa de San Breixo.