¿Que sucede no entorno do monte Medo? ¿Por que se está convertindo nunha zona tan perigosa para o tráfico? Son algunhas das preguntas que se fan os vianeses. Son xa dous accidentes de coche en cuestión dun mes, na mesma zona, con caída do vehículo ao encoro do Bao e co mesmo resultado: o falecemento do conductor.
O primeiro deles acontecía na mañá do 15 de outubro, cando un turismo conducido por unha veciña de Viana duns 70 anos se saía da vía pola marxe dereita da estrada OU-533 (A Gudiña-A Rúa) e caía ao encoro do Bao. En torno ás sete da tarde o vehículo era rescatado das augas co corpo da muller falecida no seu interior.
A piques de cumprirse un mes deste suceso, na tarde do 14 de novembro a historia repetíase. Desta volta era un veciño septuaxenario de Pixeiros (Viana do Bolo), quen ao pasar por un punto moi próximo ao do anterior sinistro, caía tamén ao encoro co seu vehículo. O falecido, T.A.S., acostumaba vir cada día do pobo para darlle a comida a súa muller, ingresada na residencia da terceira idade de Viana, que precisamente na xornada do venres celebraba o magosto. Foi o persoal da residencia quen o alertou ás forzas de seguridade ao ver que non chegaba.
Co fin de localizar e sacar o vehículo das augas do encoro montábase un dispositivo de emerxencia e desprazábase ata Viana na tarde dese mesmo día o Grupo Especial de Actividades Subacuáticas (GEAS) da Garda Civil. Sen embargo, o rescate do coche non puido lograrse ata as 12:30h. do mediodía do 15 de novembro. No operativo participaban, ademais do GEAS, a Garda Civil de Viana, a Garda Civil de Tráfico, a Policía Local de Viana do Bolo e Protección Civil, así como o GES da Gudiña, que foi quen realizou a excarcelación do conductor.
Viana está consternada por este novo suceso. Tamén neste caso o falecido era unha persoa moi coñecida en Viana e o seu irmán foi edil durante varios anos neste concello. Os veciños din que é como se unha man negra se cernese sobre o municipio con dous tráxicos accidente en apenas un mes. Tamén piden que se coloquen biondas de seguridade nesta zona para evitar novos sinistros, xa que os lugares nos que se produciron os dous accidentes carecen deste tipo de protección.
