CulturaCulturaÚltima hora

Un poeta singular na posguerra

O poeta e tradutor Xosé María Díaz Castro, de Guitiriz, homenaxeado nas Letras Galegas do 2014
Xosé María Díaz Castro, lendo na Asociación Xermolos.
Xosé María Díaz Castro, lendo na Asociación Xermolos.

Os alicerces dos seus versos están na terra que o viu nacer e medrar. A de Xosé María Díaz Castro é unha voz poética fondamente arraigada no rural, cunha mirada intimista e vencellada á natureza da Terra Chá, pero que trascende. Poeta e tradutor, é autor de Nimbos, unha obra “singular e de aparición serodia, que destaca polo seu virtuosismo técnico”, segundo se resalta dende a Real Academia Galega (RAG), que na sesión plenaria do 21 de xuño do 2013 acordaba escoller a Díaz Castro como figura á que lle adica o Día das Letras Galegas do 2014. É un ano asemade que coincide co primeiro centenario do nacemento deste vate.

Díaz Castro ven á vida en febreiro de 1914 no seo dunha familia labrega na parroquia de Os Vilares (Guitiriz-Lugo), “e desde aquela viviu ligado a esta paisaxe e contorno a carón da Serra de Montouto onde vai fenecendo a Terra Cha. Aínda que pasou moito tempo lonxe desta comarca, concretamente en Madrid, endexamais renunciou a ela e sempre que podía viña a beber nesta fonte da súa inspiración poética”, en palabras de Alfonso Blanco, un dos mellores coñecedores da obra e vida deste poeta.

O seu interese pola poesía venlle xa da infancia e con 8 anos esboza os seus primeiros versos, pero non foi ata a súa entrada no Seminario de Mondoñedo, no ano 1929, cando escribe o seus primeiros cadernos de poesía: “Follas verdes” e “Follas ó Aire”, que preferiu non editar. Ademais de cursar os seus estudos, no seminario comeza a interesarse polas linguas, dirixe unha revista escolar e algúns dos seus poemas en galego, adicados á natureza, aparecen en varios xornais como El Progreso Villalbés (1931-33).

É tamén nesa época cando se familiariza coa “densa tradición literaria, nomeadamente poética, que floreceu daquela, no ronsel de Leiras Pulpeiro e de Noriega Varela, na cidade do Masma a través de figuras como Crecente Vega, Iglesia Alvariño, Álvaro Cunqueiro ou Díaz Jácome”, segundo o perfil biográfico realizado por Ramón Villares Paz para a RAG.

Texto: Ángeles Rodríguez Foto:cedida pola Asociación Xermolos de Guitiriz

(Máis información, imaxes e programación dos actos das Letras Galegas na provincia de Ourense na edición en papel do Especial Letras Galegas do Periódico O Sil).

Artigos relacionados

Deixa unha resposta

O teu enderezo electrónico non se publicará Os campos obrigatorios están marcados con *

Back to top button
Close