Dende o Concello de Viana do Bolo vén de emitirse un bando no que se informa do positivo en coronavirus dun médico do Centro de Saúde do municipio. “Este feito xerou que varios sanitarios do Centro, por prevención, tamén deban permanecer en corentena, ademais de practicárselles as probas PCR correspondentes, estando aínda pendente o resultado das mesmas”, tal e como indica o rexedor vianés, Abelardo Carballo nun bando emitido neste sábado 3 de outubro.
Por este motivo, “durante toda a vindeira semana, o Centro de Saúde será atendido por unha soa doutora, co apoio de outros facultativos do Hospital de Valdeorras. Ante esta dificultade, solicitamos aos veciños e veciñas de Viana do Bolo a súa máxima tolerancia e comprensión, ante os posibles inconvintes que se poidan producir, tanto na atención diaria como nas urxencias do Centro”, segundo o alcalde.
No bando tamén se solicita “a máxima colaboración de todos e todas, ante calquera requirimento que parta da Consellería de Sanidade” e envíase “unha mensaxe de tranquilidade aos nosos veciños e veciñas, en tanto o Sergas vén de informar que os poucos contaxios que existen no noso concello están identificados e illados”.
Finalmente, o alcalde de Viana indica que “neste mesmo contexto, e ante a existencia nas comarcas próximas dun elevado número de contaxios, vólvese a lembrar ós e ás veciños e veciñas de Viana do Bolo a necesidade de manter as medidas de hixiene persoal e colectiva (lavado de mans con auga e xabón ou xel hidroalcohólico, e o uso de máscara) así como a necesidade de manter a debida separación entre persoas. Asemade, prégase que se limiten ó máximo as reunións familiares ou sociais”.
