A dos Maios é unha ancestral festa celebrada en toda a provincia de Ourense pero de forma moi especial na cidade, chegando a converterse nun dos principais actos festivos do ano, así como un dos que máis expectación levanta, ata o punto de chegar a ser declarada polo Consello da Xunta de 4 de outubro de 2001, Festa de Galicia de Interese Turístico na provincia de Ourense.
Cada ano, coa proximidade do mes de maio chega o tempo de culto á árbore florida da nenez e da xuventude, símbolos de vida e de fecundidade. É o tempo da primavera, da natureza, da montaña galega… E para honrala, nada mellor que carrozas de flores e froitos de formas moi diversas. Ao seu carón, artistas recitando coplas e cantares satíricos e retranqueiros con claras alusións a polémicos temas de actualidade. Niso consiste a Festa dos Maios que o primeiro domingo de maio (nesta ocasión día 3), encherá as rúas do casco vello de Ourense, nun fervedoiro de xente para asistir ao concurso de esculturas e coplas no que se involucran os diferentes colectivos. Cada ano é o propio Concello o encargado de elaborar o programa que inclúe todo tipo de actividades, dende exposicións fotográficas ata actuacións musicais, facendo especial fincapé na mostra de maios que optarán a un premio. Con ese fin, cun mes de antelación fai públicas as bases de participación que levan implícitas a súa aceptación.
Ao peche desta edición aínda non estaba confirmado o programa deste ano, pero segundo outras edicións, para o concurso os maios divídense en dúas modalidades. Por un lado están os enxebres, con formas basicamente piramidais que dalgún xeito representan á montaña, ou ben de cruceiro. E por outro lado están os artísticos no que cabe todo tipo de figuras, poñendo a proba a imaxinación e a destreza dos artistas, podendo participar tódalas asociacións culturais, colexios, grupos, colectivos veciñais, entidades e calquera persoa que o desexe, sempre que sexa maior de idade.
Iso si, as construcións que se presenten ao concurso terán que ser realizadas integramente para a ocasión e non utilizar obxectos recubertos. O musgo que se utilice deberá estar cosido ao esparto, nunca pegado e os materiais a empregar serán tradicionais: madeira, sacos de esparto, musgo, xestas, uces, carqueixas, carrabouxos, flores silvestres…
Xunto aos maios, os participantes que así o desexen cantarán as súas coplas nas que se valora a retranca, a composición, o ritmo e a linguaxe utilizados, sen botar man de palabras malsonantes.
O xurado é sempre o encargado de puntuar tanto maios como coplas para elixir aos gañadores, premiando o traballo que os participantes levan a cabo na festa da primavera en Ourense.
Fotos: Carlos G. Hervella