Entre as imaxes que forman parte do calendario do 2020 do proxecto “Ceos Galegos” figura unha moi especial do fotógrafo barquense Sindo Novoa. Nela logra capturar o mítico raio verde, un fenómeno singular, e ademais no solpor xunto á emblemática Torre de Hércules (A Coruña). A imaxe ilustra o mes de maio.
Este poxecto trata de divulgar astronomía en galego a través dun calendario de gran formato editado con imaxes feitas en Galicia. Ao longo das súas 14 páxinas percorre paisaxes típicas, fenómenos atmosféricos singulares, solpores, ceos estrelecidos e algunha imaxe astronómica de ceo fondo. Cada imaxe ten un texto breve explicando o que se observa, recollendo páxina a páxina e de xeito didáctico, conceptos e temas diversos e interesantes.
“Xa tiña colaborado con Ceos Galegos outras veces con algunha foto para uns textos, pero vai unhas semanas avisaron quen ían ser os fotógrafos que formarían parte do calendario 2020 e desta vez elixiron unha das miñas fotos. Tanto nesta edición como en edicións anteriores conta con fotos preciosas do nosos ceos galegos feitas por fotógrafos recoñecidos. Esta xa é a terceira edición”, explica Sindo Novoa.
Nesta galería de fotos poden verse imaxes da presentación do calendario na librería Sánchez Ochoa de A Coruña.
Fotos cedidas por Sindo Novoa.