No mediodía deste sábado 14 de marzo un home resultaba ferido “de gravidade despois de sufrir un corte coa motoserra que manexaba”, segundo informa o 112 Galicia. Este accidente producíase no municipio de Viana do Bolo, onde o home realizaba traballos coa máquina.
“Ao fío das 12:30 horas, os xestores do 112 Galicia foron informados do suceso polo persoal de Urxencias Sanitarias de Galicia-061. Indicaban ademais que, debido á gravidade das lesións ocasionadas, o helicóptero medicalizado con base en Ourense se desprazaba ata o lugar”, segundo informa o 112 Galicia.
Dende o Centro Integrado de Atención ás Emerxencias (CIAE) 112 Galicia informábase de inmediato do suceso aos membros do GES da Gudiña, aos axentes da Garda Civil e da Policía Local e aos efectivos de Protección Civil da localidade.