As obras de urbanización da contorna do Centro de Saúde do Couto están a piques de rematar. Estes traballos arrancaron o pasado 12 de xuño e, segundo dixo hoxe, 30 de agosto, o alcalde de Ourense, Jesús Vázquez, tras visitar a zona cos técnicos e o concelleiro de Infraestruturas, José Araújo: “para a segunda semana de outubro poderemos ver toda esta infraestrutura rematada”, asegurou o rexedor.
Esta urbanización da zona resultaba imprescindible, segundo aseguraron os técnicos municipais, para que o Concello poida darlle a licenza de apertura ao Sergas para que poña en funcionamento esta instalación sanitaria de Atención Primaria. Estas obras tiveron un custo de case 500.000 euros ( 479.710 euros concretamente) aos que hai que sumarlle os 17.908 euros do proxecto.
En concreto, estas actuacións dotarán ao Centro de Saúde do Couto de novos accesos pola Rúa Bispo Lourenzo, Castro Canseco e Velázquez, así como a instalación de novos pavimentos, beirarrúas e espazos verdes. Asemade, vanse planar “unha trintena de árbores”, dixo Jesús Vázquez. Ao mesmo tempo, para garantir a accesibilidade “dos pacientes que así o poidan requirir”, asegurou o rexedor, dotarase á zona de prazas de aparcamento. Ao mesmo tempo instaláronse as redes de abastecemento e saneamento conectadas á rede municipal e instalacións eléctricas e, finalmente, está previsto dotar ao lugar de mobiliario urbano e unha zona verde.
Segundo explicou o alcalde, o obxectivo principal desta obra, ademais de axilizar o proceso para a apertura do Centro de Saúde, “era homoxeneizar a urbanización coa primeira parte que fixemos tras a construción do Pazo de Xustiza”. E asegurou que non os técnicos alegaron que non é posible concederlle a licenza de ocupación á Xunta ata que a obra non estea rematada.
Texto: Carlos Asensio.
