Se hai dúas semanas a residencia da terceira idade San Cosme de Rubiá recibía con tristeza e preocupación a noticia de dous “positivos asintomáticos” entre os usuarios, hoxe 7 de maio, están moi contentos e orgullosos, pois veñen de recibir os resultados do segundo test de detección do Covid-19 (test serolóxico IgM/IgG), sendo todos negativos, tanto residentes como traballadores.
Foron quince días convivindo día e noite e dende a residencia aseguran que este resultado “é un triunfo, pero non o final da guerra”, conscientes de que deben seguir loitando e estar vixiantes “para protexelos a eles, a nós e ás nosas familias. Isto non vai ser doado pero polo menos sabemos que o intentamos dunha e mil maneiras”, din, sen esquecer dar as grazas polo apoio nestes días de confinamento e lembrando que “todo sairá ben”.
Fotos: Carlos G. Hervella
