CulturaCulturaÚltima hora

V Congreso Internacional de Patrimonio Etnográfico, en Ourense

O mundo dos afiadores centra o programa que se celebrará do 9 ao 13 de outubro
Florencio de Arboiro, Mariló Fernández, Rosendo Fernández e Xosé Manuel Cid, na presentación do Congreso. /Foto: Alberte Paz.
Florencio de Arboiro, Mariló Fernández, Rosendo Fernández e Xosé Manuel Cid, na presentación do Congreso. /Foto: Alberte Paz.

Poñer en valor a figura do afiador e analizar as achegas que este oficio trouxo á etnografía galega e ao noso patrimonio inmaterial, é o obxectivo do V Congreso Internacional de Patrimonio Etnográfico, patrocinado pola Deputación de Ourense e a Universidade de Vigo, que se celebrará entre o 9 e o 13 de outubro na Facultade de Ciencias da Educación, do Campus de Ourense. Nesta edición, a segunda de carácter internacional, daranse cita investigadores de España, Francia, Italia e Portugal, así como mestres, estudantes e familiares de antigos afiadores.

A presentación do congreso tiña lugar na mañá do 7 de outubro coa presenza do vicepresidente da Deputación, Rosendo Fernández; da directora do Centro de Cultura Popular Xaquín Lorenzo, Mariló Fernández; do presidente da asociación Ben-Cho-Shey, Florencio de Arboiro, e do vicedecano de Educación Social, Xosé Manuel Cid.

Baixo o título “O afiado e outras técnicas artesanais de comunidades rurais”, o evento contará nesta ocasión coa presenza de relatores que analizarán dende diversas perspectivas o mundo que discorre ao redor dos afiadores, dende a súa fala e cultura, ata a súa evolución histórica e o seu ámbito xeográfico, ademais das importantes achegas sociais que este oficio deu “pois os afiadores, como grandes viaxeiros, foron grandes transmisores de cultura e saberes”, en palabras de Rosendo Fernández.

Entre as actividades que se levarán a cabo, destaca a visita á Casa das Rodas, en Arboiro, que terá lugar o venres día 10, onde Florencio de Arboiro ten a maior colección do mundo de rodas de afiar, que poderá ser visitada polos participantes do congreso.

Ao longo dos cinco días que dure o programa, desenvolveranse ademais relatorios, mesas de debate, conferencias e proxeccións audiovisuais como a do filme A última viaxe do afiador, de Aitor Rei.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close