Continúan as vacinacións contra o Covid-19 no Hospital Público de Valdeorras neste domingo 18 de abril, no Barco. Desta volta estase a administrar a vacina, neste caso de Pfizer, as persoas do tramo de idade de entre 70 e 79 anos. Está previsto administrar unhas 320 doses ao longo desta mañá.
Vacinacións do sábado
Na xornada recibían a vacina contra o Covid en Galicia unhas 11.286 persoas pertencentes ao grupo poboacional de entre 60 e 65 anos. Así, ao redor do 70% das persoas convocadas para recibir a primeira dose acudiu a súa cita de vacinación, segundo informa a Consellería de Sanidade.
Dun xeito desagregado, e de acordo aos 14 puntos de vacinación habilitados por Sanidade, nos diferentes distritos sanitarios galegos, un total de 1.321 persoas foron vacinadas coa primeira dose de AstraZeneca na área de Ourense, Verín e O Barco de Valdeorras; na área sanitaria da Coruña 2.331 persoas foron vacinadas; 848 na área sanitaria de Ferrol; 1.964 na área sanitaria de Santiago-Barbanza; 1.191 na área de Pontevedra-O Salnés; 2.164 na área de Vigo; e 1.467 na área sanitaria de Lugo, A Mariña e Monforte de Lemos.
