Cunha diferencia de case dúas semanas con respecto ao pasado ano, vén de iniciarse a vendima na Denominación de Orixe Valdeorras. Dúas adegas desta zona vitivinícola ourensá comezaban hoxe, 12 de setembro, os labores de recollida de uva. Trátase de Godeval (con sede en Xagoaza, O Barco), que neste verán cumpría 30 anos de traxectoria, e da petinesa María Teresa Núñez.
Espérase unha colleita inferior á do pasado ano, pero dunha “calidade excelente”. “Os fenómenos meteorolóxicos adversos e a incidencia do mildiu nas cepas mermarán, previsiblemente, a cantidade de quilos de uva que se recollan na comarca”, indican dende o consello regulador valdeorrés. Asemade o seu presidente tamén anunciaba que esta D.O. reclamou recentemente á Xunta a apertura dunha liña de axudas similar á aprobada para a Ribeira Sacra.