Valdeorras, entrada da ruta xacobea

Dende o Periódico O Sil desexamos que o ano 2014 sexa positivo para todo o mundo e, en especial, para as xentes da Galicia Interior

O 2014 podería ser o ano do Camiño de Inverno. Iso é o que esperan as asociacións que levan case tres lustros traballando por esta ruta xacobea que entra en Galicia por Valdeorras, así como concellos, entidades culturais, representantes do sector turístico e hostaleiro, e os propios cidadáns. Confían en que neste ano que agora comeza teña lugar o recoñecemento oficial desta ruta, longamente demandado. Malia haber dous acordos unánimes no Parlamento de Galicia (un de decembro de 2009 e outro de febreiro do 2013, no que se daba un prazo de seis meses para publicar a resolución) esta ruta segue sen ser oficial. E iso malia á importancia que este camiño pode chegar a ter dende un punto de vista cultural, turístico e económico para os concellos e as comarcas que atravesa: O Bierzo, Valdeorras, a Ribeira Sacra lucense e O Deza.

Para reafirmarse nesa reivindicación e amosar publicamente a súa unidade, os representantes políticos, sociais, culturais e turísticos das zonas polas que discurre o Camiño de Inverno mantiñan unha xuntanza o 13 de decembro en Monforte de Lemos. Ademais destacaron o incremento de persoas que realizan este traxecto para ir a Santiago, matizando que no ano 2013 foron uns 2.500 os peregrinos que pasaron por el. E iso a pesar de que o camiño non ten a publicidade das rutas oficiais e que hai zonas cunha sinalización deficiente, como é o caso de Valdeorras.

Por iso agardan que o proceso para recoñecer a esta ruta como xacobea finalice neste ano 2014, no que ademais o Camiño de Santiago vai ter un protagonismo especial ao conmemorarse o VIII Centenario da Peregrinación de San Francisco de Asís a Santiago. Por razóns como estas neste número co que estreamos o 2014 o tema de En Portada non podía ser outro que o do Camiño de Inverno.

Pero nesta edición de xaneiro, xunto coa que os nosos subscritores recibirán o calendario de sobremesa de O Sil (que tamén se pode mercar a un prezo de 3 euros nos quioscos), hai moitos outros asuntos. Falamos, por exemplo, de economía, cunha entrevista na que coñecemos un grupo valdeorrés da construción, Actyon, que está a realizar traballos por diferentes puntos de España e do mundo, como é a canle de Panamá. E, tampouco deixamos pasar de longo, a multitude de citas gastronómicas das que poderá desfrutarse en xaneiro: a IV Ruta dos Pinchos e a XIV Festa do Botelo no Barco, a XX Cea do Cocido de Piñeiro, as VII Xornadas Gastronómicas e de Recuperación do Porco Celta de Manzaneda ou a VII Festa do Codillo da Rúa, entre outras.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies