A comarca valdeorresa está a ter o seu protagonismo na rexeneración económica da provincia. Así o demostran os datos desta comarca no VIII Observatorio Económico Ourensán, que se daban a coñecer conxuntamente cos de Terra de Trives na mañá do 21 de febreiro no Barco, nun acto no que participaban o presidente da Deputación de Ourense, Manuel Baltar; do xerente do Inorde, José Manuel Rodríguez; e do profesor Andrés Mazaira, da Universidade de Vigo. Á presentación contaba coa asistencia de empresarios de diferentes sectores, así como de alcaldes e concelleiros de boa parte dos municipios das dúas comarcas.
Manuel Baltar destacaba na súa intervención a importancia desta novidosa ferramanta de análise, cuxos datos, que se actualizan “en tempo real” indican “signos evidentes de recuperación económica da profunda crise”. Asemade apuntaba o reto demográfico ao que se enfronta a provincia.
De seguido Andrés Mazaira explicaba cada un dos indicadores que se analizan neste estudo tanto a nivel local, como comarcal e provincial e destacaba cuestións como que o mercado de traballo valdeorrés acumula unha creación neta de emprego do 3,9%, co que pasa a formar parte das catro áreas ourensás con maior velocidade de recuperación, a un ritmo do 2% por ano. As 8.079 afiliacións que contabilizaba a finais de 2016 constitúen ademais o primeiro peche anual desde 2011 no que supera a barreira dos 8.000 empregos. Por outra banda, a comarca de Terra de Trives creou un 2,3% de emprego neto no cómputo de 2016, a terceira mellor marca da provincia.
Asemade, na nova medición que introduce o Observatorio Económico, a das afiliacións segundo conta de cotización dos centros de traballo (excluíndo os factores demográficos) A Veiga (14,5%), O Bolo (9%), A Rúa (4,2%) e Pobra de Trives (4,1%) encabezan a creación de novos empregos en 2016.
Outro dato que resaltaba Mazaira é que Valdeorras é, xunto coa comarca de Ourense, a única da provincia en presentar unha idade media da poboación inferior aos 50 anos. Por contra, Trives triplica a taxa de envellecemento existente en Valdeorras.
Fotos: Carlos G. Hervella