En portadaGalerías de fotosÚltima hora

“Valdeorras o noso tesouro”, un libro que conta e ilustra a historia desta comarca

Presentábase nun acto con escolares na mañá do 6 de xuño no Teatro Lauro Olmo do Barco

Dende a Prehistoria ata a actualidade. A xeografía, a historia, a gastronomía, o viño, as lendas, o deporte… “Valdeorras o noso tesouro” narra e ilustra a historia desta comarca, entrada natural a Galicia, cun enfoque dirixido principalmente aos nenos, pero tamén aberto aos maiores. Así o explicaba na presentación deste libro ante escolares barquenses o 6 de xuño no Teatro Lauro Olmo da vila Antonio Castro Voces, autor dos textos da obra xunto a David D. Vázquez, Pablo Fernández Rodríguez e Alfredo Guitián, tamén no acto.

“Este era un baleiro que había nas aulas, os profesores non tiña nun texto, un manual da historia da nosa comarca. O obxectivo inicial deste libro era dotar tanto a mestres como a alumnos dunha ferramenta de traballo que lles fixese máis doado o coñecemento dos aspectos máis destacados da nosa comarca dende hai milleiros de anos ata hoxe en día Aurentino Alonso foi o autor da idea, a persoa que vinculou isto co ensino”, engadía Castro Voces.

A obra está estruturada en once apartados e, xunto cos textos, outro dos seus piares son as ilustracións, realizadas por Juan José Albares Arias e Patricia Fernández. Con elas preténdese “axudar a dixerir esta historia, esta pequena enciclopedia, que é bastante completa, para que o público en xeral coñeza esta marabillosa historia  da terra na que levo traballando 18 anos”, comentaba Albares.

 

Un dos momentos da presentación do libro./ Foto: Carlos G. Hervella.

 

A elaboración do libro durou un ano, pero “estivo sete anos en estado embrionario, ata que finalmente saíu”, comentaba o propio Aurentino Alonso, que ademais de profesor é concelleiro de Deportes do Barco. Na súa intervención destacaba que “o propio libro é un gran tesouro e tócavos a vos ser os seus gardiáns”, dicíalles aos escolares. Ademais agradecía aos autores a súa “disposición a participar incondicionalmente nesta aventura e a ilusión coa que iniciástedes este proxecto”.

Pola súa banda, Pablo Fernández agradecía ter podido “asistir á creación deste libro, que os nenos nin se imaxinan o que supón, é algo moito máis difícil que un quebracabezas de 2.000 pezas, pero disfrutámolo e foi unha sorte estar neste proceso”. E David D. Vázquez resaltaba que “atrás dun libro hai un grupo de persoas que traballaron nel, e no caso deste, somos todos nós”, ademais animaba aos rapaces a coller os libros e a lelos. “Cando un libro está nun andel, abandonado, considérase prisioneiro e necesita ser liberado, sentirse libre outra vez nas mans dun rapaz. Nos libros está todo. Neste vades aprender moito sobre a comarca de Valdeorras e a tamén a sentirvos orgullosos de ser valdeorreses”.

A presentación concluía cunha serie de preguntas na que os escolares preguntaban sobre dúbidas ou curiosidades do libro. A saída da presentación, cada estudante recibía un exemplar deste libro, editado pola Deputación de Ourense en colaboración cos Concellos do Barco e da Rúa.

Fotos: Carlos G. Hervella.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close