Os seis mellores equipos galegos de veteranos (por estadillo) dábanse cita na tarde do 23 de decembro na pista de atletismo de Expourense para desputar a I Copa de Clubes Master. No decurso desta competición establecíanse ata 17 novos récords galegos, algúns deles con selo valdeorrés.
Así entre eles destaca o do vilamartinés Luis Nogueira, quen melloraba as marcas de 60 mv (11.86) e de tripe (10,09 m) na categoría M-60. Ademais o seu club, o Adas Proinor, proclamábase vencedor desta competición galega en homes cun total de 56 puntos, ocupando a segunda posición o C.A. Santiago con 49 puntos. No terceiro lugar situábase A Silva con 44 puntos. Os valdeorreses conseguían a vitoria grazas á súa regularidade a nivel xeral xa que só gañarían en tres probas, polas seis dos santiagueses, os segundos clasificados.
Na categoría feminina sería o Club Atletismo Sanmertolameu o vencedor con 51 puntos, estando acompañado no podium por A Silva con 44 puntos e do ADAS-Proinor con 40 puntos. As de Moaña terían en Rosa Ana Santos a unha das súas máis destacadas atletas, gañando para a súa formación as probas dos 60 m.l. e dos 200 m.l.
