Percorren todos os municipios da comarca de Verín-Monterrei, pero cada unha delas cunha temática e características específicas. Están pensadas para todas as idades e condicións físicas e contan cunha sinalización clara e cun trazado circular que permite chegar ao mesmo punto de partida. Así son as trece novas rutas cicloturísticas presentaba na mañá do 5 de novembro o
Plan de Competitividade (PCT) Portas de Galicia en Verín.
O obxectivo: “percorrer as dúas comarcas, unha a través de rutas BTT e outra a través de cicloturísticas (bicicleta e a pé), e unir o xeodestino Verín-Viana nunha rede de rutas con máis de 500 quilómetros sinalizados”, segundo se indicaba na presentación que corría a cargo de Antonio Augarón Turrientes, delegado de Turismo da Xunta en Ourense, Juan Manuel Jiménez Morán, alcalde de Verín e presidente da comisión de seguimento do PCT Puertas de Galicia, e Ignacio Fernández Dosil, xerente do PCT Puertas de Galicia. Tamén acudían os alcaldes dos concellos que forman parte do PCT e o xerente do Inorde.
Esta listaxe de trece rutas inclúe as dos Cañóns da Armada (27,9 quilómetros), Volta a Laza (6 quilómetros), Balcóns do Támega (46,5 quilómetros), Ruta Termal e da Auga (18,6 quilómetros), Vertixinosa volta ao Pozo do Demo (22,7 quilómetros), A ruta das viñas (12,3 quilómetros), O gran silencio do contrabando (25,8 quilómetros), Volta a Oímbra (6,3 quilómetros), As cores do viño. Ruta dos lagares (36,3 quilómetros), O país dos castros (39,3 quilómetros) e Corazón de pedra do Señor do Larouco (32,4 quilómetros).
Ademais fíxose unha ruta de enlace co punto de información do centro BTT en Riós (que comeza na de O gran silencio do contrabando e conclúe neste centro de bicicletas de montaña).
Estes itinerarios poden consultarse tanto na web www.rutascicloturisticasverin-monterrei.com (onde se poderán descargar os tracks das mesmas), como nos 10.000 folletos editados sobre as mesmas (atópanse nos edificios públicos dos diferentes municipios).
O centro BTT Portas de Galicia dispón dun total de 244 quilómetros de percorrido, divididos en doce rutas sinalizadas, nove circulares e tres de conexión entre elas: Carballeiras, Os Castros, Encoro do Vao, As Telleiras (estas destinadas a afeccionados, familias os grupos de amigos), Valmedo, Riós-Barxa, Pena Maseira, Tres Reinos, A Gudiña-Entrecinsa, Val do Río Conso, Vilariño de Conso-Viana do Bolo e A Escrita (para os máis expertos).