CulturaCulturaÚltima hora

Verín recolle nun portal pioneiro a prensa existente na vila de 1893 a 1936

Son oito os semanarios incluídos no proxecto, que continúa vivo e que vén de presentarse publicamente nun acto na Biblioteca de Verín

Ata catorce cabeceiras chegaron a editarse en Verín entre finais 1893 e 1936. Algo moi inusual en vilas deste tipo e mesmo en cidades. Esa riqueza xornalística, reunida e conservada en preto de 2.000 reproducións que foron doadas en decembro de 2016 por Santiago Cid Harguindey á Biblioteca Municipal de Verín, está agora a disposición de investigadores e dos veciños de Verín a través de internet. Poden consultarse no portal http://hemeroteca.bibliotecadeverin.es .

Esta nova web, na que se vén traballando nos últimos meses dende a biblioteca en colaboración con outras persoas, dábase a coñecer na tarde do 6 de outubro nun acto presentado por Luis Cougil e no que participaban o alcalde de Verín, Gerardo Seoane, xunto cos xornalistas Xosé Carlos Caneiro e Rafael Cid; un dos responsables da biblioteca, Vicente Rodríguez, e María Isabel Villamarín, autora dun traballo sobre a prensa local na comarca de Monterrei.

Vicente Rodríguez comezaba explicando en que consiste esta base de datos aloxada na web da bibioteca, como pode accederse a ela, así como o traballo realizado ata o de agora para facela posible. Un traballo “colectivo” e “a anos vista”, dado que a biblioteca compatibiliza este labor coa súa ampla e variada axenda de actividades ao longo do ano. Asemade Rodríguez destacaba o motor de búsqueda da nova web, xa que cada un dos xornais dixitalizados (oito polo de agora) e catalogado pode localizarse a través dunha procura cronolóxica, pero tamén temática.

De seguido tomaba a palabra Xosé Carlos Caneiro, quen amosaba a súa satisfacción ante esta iniciativa “porque creo que estamos diante dunha das actuacións culturais máis importantes da historia de Verín que eu recorde” e facía un recoñecemento público ás persoas “que fixeron esta historia extraordinaria que ten Verín con respecto ao xornalismo. Non hai moitos lugares de Galicia cunha historia xornalística como a nosa, nin sequera de España”.

Nese mesmo aspecto incidía Rafael Cid. “A puxanza da prensa de Verín só é comparable á que había en Cataluña nese momento, cunhas 15 cabeceiras e dúas imprentas”. Ademais cualificaba este proxecto como “un novo valor para que siga medrando esta biblioteca”.

 

Labor de catalogación.

Pola súa banda, o alcalde de Verín, Gerardo Seoane, lembraba que “hai máis de dous anos, cando nos tocou a responsabilidade de gobernar este concello, unha das primeiras cousas que tiñamos na cabeza era recuperar a identidade como pobo. Non é contar unha historia, senón identificarnos cunha parte da nosa historia”. Incidía asemade no valor de dixitalizar estes semanarios e “poñelos ao servizo do público”, algo, destacaba, que “xenera un motivo de orgullo e de identidade”. Asemade agradecía o traballo de todas as persoas implicadas neste proxecto e adiantaba que o Concello de Verín ten previsto editar o traballo sobre a prensa local realizado por María Isabel Villamarín, que falaba tamén no acto sobre este mesmo tema, e tamén preparar unha exposición.

A presentación pode verse en:
https://www.youtube.com/channel/UCfEHvm_5aBBaUQv_3NfvBAQ

Fotos: Biblioteca Municipal de Verín.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close