A proba automobilística, que conta con 96 quilómetros cronometrados, terá lugar os días 22, 23 e 24 de setembro
A sexta edición do Rallye Ourense-Ribeira Sacra conta con 148 participantes inscritos, que competirán pola vitoria os días 22, 23 e 24 de setembro, nos 96 quilómetros cronometrados.
O presidente da Deputación, Manuel Baltar, asegurou na presentación de hoxe, 21 de setembro, que se trata dunha proba xa consolidada “que aglutina dúas cuestións que estamos moi interesados en promover: Ourense como escenario perfecto para probas automobilísticas de primeiro nivel, e para seguir promocionando a declaración de Patrimonio Mundial pola UNESCO da Ribeira Sacra”.
“Esta proba automobilística, que atrae a pilotos e a escudarías de primeiro nivel, supón un importante evento para promocionar turismo e deporte na nosa provincia e para poñer en valor a gran capacidade organizativa que temos en Ourense”, engadiu Baltar.
O percorrido de 386 quilómetros conta con 96 quilómetros corresponden a nove tramos cronometrados por estradas asfaltadas nos concellos de Ourense, Maceda e Nogueira de Ramuín. O parque pechado e o parque de traballo situaranse nas inmediacións do Campus da Auga, na zona universitaria de Ourense, mentres que a oficina do Rallye e a dirección de carreira estarán ubicadas no Pavillón da Universidade.
Ademais de Alberto Meira, Victor Senra e Iago Caamaño, que loitarán pola vitoria e polo campionato autonómico, tamén participará o equipo de Tomi Makinen Racing, cos pilotos Hiroki Arai e Takamoto Katsuta, quen tamén competirán no vindeiro rallye Racc Cataluña.
Nesta presentación tamén estiveron presentes o alcalde de Nogueira de Ramuín, César Parente; o concelleiro de Deportes de Ourense, Mario Guede; o presidente da Escudaría Luíntra, Roberto Soto; o presidente da Federación Galega de Automobilismo, Iván Corral; e o coordinador do equipo MM-Motor sport Estonia, Kristo Kraag.
