Entre a vexetación e con algunhas das súas numerosas pedras deitadas no solo, resiste o paso do tempo o foxo de lobo de Ardexaxe (Viana do Bolo). Aínda así, os elementos que se conservan del revelan a súa factura orixinal e a súa monumentalidade. Esta é unha das antigas trampas de lobo que todavía poden admirarse na provincia de Ourense.
Agora, dende o Concello de Viana do Bolo preténdese recuperar esta singular mostra de patrimonio etnográfico. A idea, segundo adianta o tenente de alcalde e concelleiro de Medio Rural, Santiago Barja, é preparar un proxecto de restauración deste foxo e tamén trazar unha ruta de sendeirismo para chegar ata o alto do outeiro onde se atopa co fin de que tanto veciños como visitantes podan coñecelo. Xa se están dando os primeiros pasos neste senso.