Tendo en conta a proximidade das vacacións escolares, o Concello de Viana do Bolo vén de facer públicas as actividades infantís que promoverá neste verán: ludoteca e campamento. “Como novidade este ano terán unha maior duración no tempo e darán cobertura a meirande parte do mes de xullo e a metade de agosto”, segundo o alcalde de Viana, Secundino Fernández.
Tamén sinala que “as actividades terán como obxectivo a diversión e o ocio dos/as participantes, pero tamén a educación e a transmisión de valores sociais importantes (a igualdade, o respecto ao medio ambiente, o traballo en equipo, compañerismo, etc.)”.
Entre elas haberá xogos ao aire libre, festas temáticas, xincanas, saídas á piscina, excursións, deportes, etc. O prazo de inscrición para que os cativos poidan anotarse nelas está aberto dende hoxe, 19 de xuño. As inscricións poderán facerse no Concello de Viana.