Camiñando ou en bicicleta de montaña. Son as dúas posibilidades para poder participar no evento deportivo que o Concello de Manzaneda organizará na mañá do vindeiro domingo 12 de xuño. Trátase da súa VII Andaina que aúna deporte, natureza ou patrimonio e que dende o pasado ano complementa o traxecto a pé cunha ruta de BTT.
O seu percorrido será, novamente, circular e con saída e meta na vila de Manzaneda. Os primeiros en partir serán os participantes na andaina, que sairán ás 9:00h. dende a escola. Por diante terán un circuíto de 19 km que percorrerá lugares como Seoane, San Paio, Langullo, Cubeiros, Borruga, San Pedro ou A Corredoira. Estímase que a ruta completarase nunhas cinco horas.
No caso daqueles que opten pola BTT, o traxecto serán duns 37 km. A saída das bicicletas está fixada para as 9:30h. tamén diante da escola de Manzaneda. Dende aí os ciclistas enfiarán cara Aceboso, Sobrado, Langullo, A Mata, Cubeiros, Borruga, San Pedro e Seoane.
Ao longo do trazado estableceranse puntos de avituallamento e controis de paso. E, ao concluír as probas, ofreceráselle un xantar popular aos participantes no punto de saída.
Esta VII Andaina e II Ruta BTT será organizada polo Concello de Manzaneda en colaboración con Protección Civil deste municipio e coa Cruz Vermella. Para ampliar información pode visitarse a páxina www.concellodemanzaneda.gal.