Na reunión celebrada pola Xunta de Goberno da Deputación de Ourense neste xoves 11 de outubro aprobábanse axudas por importe de 425.528 euros para concellos, mancomunidades e entidades da provincia para iniciativas deportivas, culturais e de infraestruturas.
No apartado de cooperación con concellos e mancomunidades da provincia, dábase luz verde, entre outras axudas, a 14.909 euros para o Concello de Larouco para a pavimentación e rehabilitación da rúa Igrexa Vella e a 25.000 euros para o Concello da Pobra de Trives para os gastos de funcionamento da Escola de Música e para a adquisición dun piano.
Para o Concello de Ramirás aprobouse unha axuda de 25.000 euros para a adquisición dunha furgoneta para o transporte público municipal, mentres que para o Concello de Vilamartín de Valdeorras aprobouse unha axuda de 13.050 euros para captación de auga no río Farelos, e outra de 17.000 euros para a mellora do firme en Surregos (Córgomo). Para o Concello de Xinzo aprobouse unha axuda de 6.000 euros para a adquisición dun tapiz de ximnasia rítmica, e outra de 126.380 euros para a urbanización da rúa do Peto.
A Mancomunidade de Verín recibirá unha achega de 6.000 euros para a asistencia técnica e para o premio Xesús Taboada Chivite, e outra de 6.292 euros para a un sistema de climatización na nova sede. Para “Terra de Celanova” aprobáronse 50.000 euros para gastos de funcionamento da entidade, e para a Mancomunidade Conso Frieiras, unha axuda de 40.000 euros para a mesma finalidade.
Ademais a Xunta de Goberno aprobou as bases reguladoras da convocatoria do concurso para a concesión de axudas a deportistas ourensáns cualificados en modalidades deportivas individuais durante a tempada deportiva 2017-2018. Estas axudas pretenden fomentar a práctica deportiva e incentivar aos deportistas ourensáns cualificados mediante o recoñecemento da súa traxectoria e rendemento deportivo. A contía máxima da axuda por solicitante é de 3.000 euros.