En portadaGalerías de fotosÚltima hora

Viño e comercio únense no XI Mercaberto do Barco

Esta mostra de oportunidades, que promove O Barco Centro Comercial Aberto, terá lugar os días 23 e 24 de agosto

Con moitas novidades chega o XI Mercaberto, a mostra de oportunidades que cada verán organiza O Barco Centro Comercial Aberto (CCA). Unha delas será a súa duración: dous días. Así a mostra celebrarase o 23 e o 24 de agosto no Paseo do Malecón do Barco, tal e como sinalaba durante a presentación deste evento a presidenta desta entidade, Sandra Moldes, que comparecía acompañada polo presidente e vicepresidenta da Ruta do Viño de Valdeorras, Joaquín Sánchez e Montserrat Rodríguez, así como pola concelleira de Comercio do Barco, Irene Dacal, e pola técnica da Ruta, Cristina Núñez .

No seu recinto feiral poderán visitarse unha decena de postos de comercios de diferentes sectores (confección, agasallos, complementos, decoración e tecnolóxico) que ofrecerán ao público oportunidades e interesantes ofertas en diversos produtos. Esta feira abrirá as súas portas o venres 23 de agosto ás cinco e media da tarde e funcionará ata as 23h. Ao día seguinte, reabrirá cun horario ininterrompido de 11h. a 23 h.

 

Establecementos participantes nesta edición do Mercaberto.

Outra das novidades deste Mercaberto serán as súas actividades complementarias, algunhas delas vencelladas co sector vitivinícola e que serán promovidas polo CCA e pola Ruta do Viño de Valdeorras. Denomínanse “Aromas de Valdeorras. Espíritos con vida propia” e inclúen un obradoiro infantil de sabores (gratuíto), dirixido a nenos de entre 5 e 14 anos. Será impartido pola sumiller Mercedes González o 24 de agosto entre as 11:30h. e as 13h. Terá un aforo limitado a 40 cativos e será precisa inscrición previa, tal e como avanzaba a técnica da Ruta do Viño de Valdeorras, Cristina Núñez.

O mesmo sábado pola tarde, entre as 19:30h. e as 21h. realizarase unha “cata a cegas: proba sensorial” (para un máximo de 50 persoas), tamén dirixida pola sumiller Mercedes González. Será necesario anotarse con anterioridade e o seu custo será de 5 euros (teléfono 988 32 11 50).

“Creo que na comarca temos que fomentar a unidade, nós estamos colaborando con diferentes asociacións, con sectores como a hostalaría e os aloxamentos, e neste caso facémolo co comercio. Queremos apostar por amosar o patrimonio vitivinícola da comarca, pero uníndoo tamén co resto do seu patrimonio”, comentaba o presidente da Asociación Ruta do Viño de Valdeorras, Joaquín Sánchez.

Ademais, tanto na tarde do venres como na do sábado (de 18h. a 23h.), haberá inchables para os cativos. E como broche da mostra, o sábado a partires das nove e media está previsto un concerto a cargo do grupo valdeorrés Os Broders.

A presidenta do Barco CCA, Sandra Moldes, agradecía a colaboración dos comerciantes participantes e animaba ao público a visitar o Mercarberto e a desfrutar das súas actividades. Do mesmo xeito se manifestaba a concelleira de Comercio do Barco, Irene Dacal, quen destacaba o esforzo do CCA por promover iniciativas como o Mercaberto que dinamizan á zona.

Fotos: Ángeles Rodríguez.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close