“Sicixia” a nova longametraxe do director valdeorrés Ignacio Vilar, vén de ser seleccionada entre 128 filmes de ficción española para competir na Sección Oficial do XXI Festival Cinespaña de Toulouse. O filme competirá con outras 6 longametraxes “ante un xurado formado por recoñecidos profesionais do cinema francés, sendo 100% galego, o que supón un notable recoñecemento ao noso cinema e á nosa cultura”, explican dende a produtora Vía Lactea Filmes.
O filme, que supón “un paseo polo amor e a Costa da Morte” foi concebida para poñer en valor “a inigualable riqueza paisaxística, gastronómica e cultural da Costa da Morte así coma a Rapa das Bestas de Sabucedo a través da grande pantalla” e a productora celebrará mañá 17 de setembro un pase privado nos Cinemas Os Cantóns (A Coruña) aos que estarán convidados representantes de diferentes institucións e entidades, entre eles os 18 concellos da Costa da Morte.
A preestrea, organizada en colaboración coa empresa Porto-Muíños, será o xoves 3 de novembro en París (Francia). Tal como adiantan dende a produtora galega, logo da proxección ofrecerase aos convidados pertencentes aos eidos da cultura, o turismo, a gastronomía e mesmo a política, unha degustación de viño Godello da D.O. Valdeorras e un menú a base de algas “elaborado por chefs de recoñecido prestixio internacional, ofrecendo aos espectadores unha experiencia inesquecible a través dos 5 sentidos”.
A estrea está prevista para o venres 25 de novembro de 2016 en máis de 40 salas (Galicia e resto de España) tanto en V.O. galega como V.O.S.E.