Na mañá do 10 de febreiro, o delegado territorial da Xunta en Ourense, Rogelio Martínez achegábase ata a localidade de Viana do Bolo para comprobar o resultado das obras de mellora realizadas no CEIP Bibei e no IES Carlos Casares.
Acompañado pola directora do centro, Francisca Rodríguez, e pola xefa territorial do departamento educativo, Mercedes Gallego, Rogelio Martínez iniciou a visita no CEIP, onde os traballos consistiron na reforma da instalación eléctrica, a reparación do patio cuberto, e a substitución do depósito de gasóleo, amais da protección da saída do comedor. As referidas actuacións supuxeron un investimento de máis de 26.000 euros.
A segunda parada era no IES Carlos Casares, onde a Xunta vén de investir preto de 8.000 euros nas obras de impermeabilización e reparación de goteiras. O director do centro, Carlos Ferreiro, acompañou ao delegado na súa visita, durante a cal anunciou que “a Consellería de Educación investirá este ano preto de 580.000 euros nas obras de reforma, ampliación e mellora (RAM) de centros de Primaria e Secundaria ourensáns”.
Amais de interesarse polas obras executadas en ámbolos dous centros vianeses, Rogelio Martínes tamén se achegou ata o CPI Laureano Prieto, situado no concello da Gudiña, para informarlles das obras de mellora dos accesos ao pavillón polideportivo que se executarán este ano e que incluirán a instalación dunha marquesiña. Nesta actuación o departamento educativo investirá 22.000 euros executando as obras durante o período non lectivo das vacacións de verán, co fin de non interferir na actividade académica e para que poidan estar rematados de cara ao inicio do próximo curso escolar.