Proxectos culturais e de cooperación internacional, como o que actualmente está a desenvolver a institución provincial en Manila, colaborando na recuperación do casco histórico da capital filipina por medio da arquitecta Eva Reza, levou ao presidente da Deputación de Ourense, Manuel Baltar, a manter unha reunión no Pazo Provincial co director da Academia Filipina da Lingua Española, José Rodríguez Rodríguez (natural de San Xoán de Río). Para este proxecto, explicou Manuel Baltar, a Deputación de Ourense foi elixida pola Axencia Española de Cooperación Internacional para o Desenvolvemento (AECID) para participar na recuperación de “Intramuros”, a cidade amurallada máis antiga de Manila, construída polos españois no século XVI e que constitúe o distrito máis antigo da cidade.
O presidente do goberno provincial cualificou a José Rodríguez como “un ourensán universal que alí onde desenvolve a súa actividade profesional, ben sexa no ámbito do xornalismo, da cultura o no desempeño de tarefas institucionais sempre ten presente as súas orixes”.
José Rodríguez (San Xoán de Rio, 1950), xornalista e escritor, é director da Academia da Lingua Española en Filipinas. Pasou a maior parte da súa carreira como xornalista na rexión de Asia-Pacífico, onde foi delegado xeral da Axencia Efe. Foi asemade director de Relacións Institucionais de Unión Fenosa Grupo de Asia-Pacífico, e director do Instituto Cervantes de Manila.
Na súa ampla traxectoria profesional José ten unha extensa bibliografía na que destaca o libro “Cruceiro-Spanish Galicia at Some Crossroads in Philippine History and Culture (1521-1898)” que escribiu xunto co historiador filipino Lino L. Dizon. Na actualidade está a preparar a colección Clásicos da Literatura Hispano-Filipina.