Os máis pequenos son os destinatarios da nova iniciativa posta en marcha pola Fundación Curros Enríquez e o Concello de Celanova relacionada co Mosteiro de San Salvador de Celanova.
Dende mañá día 14, todos os venres de xullo e agosto ás 11:30 horas, partirá da oficina de turismo esta nova visita de carácter gratuíto. Cunha duración aproximada dunha hora o aforo será de 20 nenos como máximo.
Tal como explican dende a organización, seguindo os pasos do fundador, San Rosendo, os asistentes retrocederán máis de mil anos, para coñecer o uso que se lle daba ás dependencias que actualmente teñen acceso desde o claustro barroco como a cociña, o refectorio, a horta da Capela de San Miguel ou a igrexa. Da man dun dos guías da Fundación Curros Enríquez ou da oficina de turismo “iremos coñecendo o uso actual e o orixinal destes espazos atopándonos neles unha pequena simulación da man da personaxe de San Rosendo, que ademáis de abade foi tamén un simple monxe en Celanova”.
Tras iniciativas como o programa escolar “Ven coñecer a Celanova de Curros e Celso Emilio”, as visitas teatralizadas nocturnas polo Mosteiro e por Vilanova dos Infantes ou os micro concertos de órgano para grupos concertados, xurdia acomezos de ano a posibilidade de ampliar os destinatarios das visitas organizadas pola vila de Celanova e arredores. “Pensando nun primeiro momento en centros escolares de primaria que xa comezaron a solicitar a realización de visitas por Celanova, Castroamo e Vilanova dos Infantes a través da Fundación Curros Enríquez, xurde a idea de organizar unha visita centrada non tanto na parte artística do edificio senon na vida que tería en tempos anteriores á desamortización, cando os monxes habitaban, traballaban e daban vida a este mosteiro”, explican dende a Fundación, apostando por unha visita cun carácter máis didáctico” .
Nas imaxes (cedidas) podemos ver os alumnos do CEIP de Sandiás, os primeiros en participar na proba desta visita.
